При земјотрес треба да се скриете под масивна маса, да се свиткувате во клопче, со една рака ја штитите главата, со другата да се држите за масата. Под рамка на врата можете да се засолните само доколку истата е поставена на носечки столб на објектот.

Батериска лампа е од суштинско значење, бидејќи во случај на земјотрес вообичаено се прекинува дотокот на електрична енергија. Преку радиските сигнали надлежните служби известуваат за настаните на теренот и ги советуваат граѓаните коишто ги затекнал земјотресот.

Сеизмолозите сеуште се трудат да најдат начин и метод, според кој би можеле да го предвидат земјотресот, кога ќе се случи, но тоа сеуште не им успеало. Но, знаат, врз основа на претходни земјотреси, каде може да се случат и колку силно.

Магнитудата ни кажува колку енергија се ослободила со земјотресот. За секој следен степен на силина на земјотрес таа енергија се зголемува приближно за 30 пати. Земјотресот со магнитуда 5 е речиси 1000 пати посилен од оној со магнитуда 3. Учинокот на земјотресот на површината се изразува со степен на интензитет на земјотресот.

Најсилниот земјотрес на територијата на Р.Макеоднија се случил на 4.4.1904 година помеѓу Пехчево и Кресна – Р. Бугарија. Имал интензитет од 10 степени по Меркалиевата скала што според Европска макросеизмичка скала изнесува 98  и магнитуда од 7,8 по Рихтер односно по новите мерења 7.5 по Рихтер, со што се води како најсилен регистриран земјотрес на Балканот и е еден од најсилните во Европа откако се вршат мерења, некаде од 19 век, па наваму.

Целата територија на Р.Македонија е подложна на земјотреси, разликата е во ослободената енергија. Најсилниот земјотрес на Балканското копно се случил во епоцентралното подрачје Пехчево – Кресна. Но сепак, тука се епицентралните подрачја Скопје, Валандово, Битола, Охрид, Гевгелија, Дојран, Дебар , чиишто жаришта можат да проиведат земјотреси чии магнитуди би биле над 6 степени по Рихтер. Постојат само две подрачја, околку Прилеп и селата Самоков и Белица кадешто се забележува исклучително слаба активност на земјата.

Дрвените градби се најбезбедни во случај на земјотрес, бидејќи дрвото е флексибилно и лесно се поместува додека се тресе земјата, додека при рушење остануваат големи празнини за криење. Воедно,  при рушење дрвената градба има исклучително помална зафатнина од бетонот или од циглените ѕидови. Циглените ѕидови се кршат на големи делови и предизвикуваат поголема повреда од бетонските кои вообичаено се кршат во повеќе помали и тешки парчиња.

Недвижностите вообичаено се највреден дел од семејното осигурување. Тоа значи дека штетата којашто би ја претрпеле осигурениците е исклучително висока. Со цел исплаќање на штети предизвикани од земјотрес, осигурителните компании исто така се осигуруваат – кај најголемите светски реосигурителни друштва со кои склучуваат договори за осигурувања, кои во случај на земјотрес ќе овозможат исплата на настанатата штета.